realcuerdos

Descubríemos a eso de los dieciséis años, tovía asoleyaos y nuevos, llugares con nomes y aires que nos sonaben a llugares que namás sintíemos en dalgún cantar, sones con tastu a sidra, gaita y panderu énte’l carbayu y la caoba y la xarra de cerveza frío esnalando faza’l gargüelu, tamién oyíamos pallabres d’eses que nos decíen que taben morriendo, pero que siempres taben vives na cocina casa, nes cais de los nuesos pueblos y en dalgún llibru que poco a poco la sociedá quería arrequexar pa que namás los lleera’l polvu, y el poeta nos decía que “yeren pallabres vieyes, descubiertes nun cantar de Dixebra que por aquella teníemos en casa, prestáu por dalgún collaciu “raru”, como una novedá, cuando les canes asomaben yá pela azotéa de Xune. Yeren años de primeros glayíos na cai, onde too diba a algamase a la vuelta la esquina, onde la llucha tenía namás tastu a folixa y la comparsa arecista entamaba a facenos preceguera, anque la xente cola que díbemos yá glayara milenta veces escontra y a favor de tantes coses que munchos garraben la pancarta con sentimientu de rutina. Medramos, pasaron años, glayíos, llares d’alcuentru, decepciones, nuevos cantares, pero siguimos avanzando ensin dexar que nos venciera la rutina y faciendo más sele les coses... güeyando bien el camín pel que caleyar, pisar fuerte y avanzar; eso sí enxamás dexar de lláu la llucha y l’enfotu de que... hai que siguir... asina y equí, dando-yos caña.