Rutines

Dexáime qu’alloqueza de sorrises,
De tardes ente regullinos de sol,
Como si fore un riscar,
Y namás qu’escuchar
El golpiar de les gotes marielles
Moyando nel espalme al escanciar la vida,
Como si foren gotes d’orbayu
aportando esnales a la boca del poeta.

Dexáime’l verde reflexáu na mar
- inmensa, eterna-
Les flores esnalando ente’l to pelo
Les manes ataes de llibertá,
Dexáime la claridá del amor
-calezo, allumante-
Y matar rutines,
Ñubes prietes,
Llercia y esporpoye de señaldá,
Sieglos,
Dómines...
Tiempu ruin arrequexáu
Iviernos enguedeyaos...
Dacuando, dexáime, dalgo pa escaecer
Y muncho per recorrer
Ensin priesa y con sorrisa
Percorrer...

Dexáime facer nueves
Les coses que ñacieron pa ser rutines.